willkome uf mim schlittehundepla.net!

**********

uf minnere website gaaz um:

mini erläbnis mit schlittehünd, vor allem im Äkäskero schlittehunde zäntrum z Lappland / Finnland, wo zäme mitte Orion, dä Omega, em Inook und em Zorro no rund 400 anderi huskiis läbed.

**********

und jezz än uszug us mim läbeslauf

22. januar 1968:	bin gworfe worde.
1969:	mini eltere hüäted apunzuä dä schpaniel Didi, wo mir uf schritt und tritt nachelaufd.
afangs 90er jaar vom letschte jaarhundert:	im winter amix äs paar schlittehunderäne goge luäge.
summer 1994:	i de Länzerhäid am schtrasserand ä tafle xee: "Huskyzwinger/Führungen nach telefonischer Anmeldung".
	dä Thomi zäiged für 10 franke ufere wise, wonner än chline zwinger ufgschtellt hät, sini rund 20 hünd, referiert chli übers ires wäse und gitt äs mars zum zviäri. und er verzellt vo sim vorhabe, im winter uf dä Plaunebäni (Flims/Laax) schneeschuä- und hundeschlittewuchenänd azbüüte.
märz 1995:	uf dä Plaunebäni mini erschte erfaarige uf dä kufe vomäne hundeschlitte xamlet.
summer 1995:	di erschti räis uf Finnland: mittem flugi uf Kittilä und dänn äs paar täg i dä Äkäskero Wilderness Lodge. (nachär isches dänn mittem ggar wiiter as Nordkapp gange, aber dasch äigetli nüt, wo sich loont zum verzele)
	s hundekämp vom Benkku agluäged und s erschtmal vo sine wildnistuure und dä schlittehundeschuäl kört. im hundekämp dä Zorro känegleert. er isch viär mönet alt und drängd sich immer in vordergrund, wänn lüt ume sind.
märz 1996:	s erschti mal ä wildnistuur puäched. dä Zorro lauft i mim tiim. diä tuur isch so genial xi (tanke Priitta), dasi beschlüsse im novämber druff id schlittehundeschuäl z gaa.
novämber 1996:	s erscht mal i de schlittehundeschuäl, wiider d Priitta as gäid und dä Zorro vorem schlitte. ich buzze jede tag dä zwinger vo de Orion und dä Omega (6 mönet alt), d Orion und d Omega wäsched jede tag mis xicht.
februar 1997:	ä foti mittem Zorro und em Polaris uf dä rugge tätowiäre laa.
summer 1997:	viär wuche mittem auto dur Skandinavie. und natürli s hundekämp psuächt.
novämber 1997:	schlittehundeschuäl. dasmal mit hünd vo diwärse gäiz.
april 1998:	zwäi wuche mittem auto dur Finnland und Norwege. und natürli s hundekämp psuächt und ä tagestuur gmacht.
novämber 1998:	schlittehundeschuäl. mitte Priitta und irne hünd (Zorro, Orion, Omega, ...)
novämber 1999:	schlittehundeschuäl. gäid und hünd wiä gehabt. jede tag dä viär wuchen alti chlini Inook gfüättered. er isch dä soon vo dä Omega.
summer 2000:	viär wuche mittem auto dur Skandinavie. psuäch im hundekämp. dä chlini Inook isch gar nüme so chli.
novämber 2000:	schlittehundeschuäl. gäid und hünd das übliche (Orion, Omega, Inook, Zorro, ...), d Priitta hät allerdings no susch vill ztuä und isch nöd immer ume. aso treniär ich iri hünd öppenämal aläi (gemäss irne awiisige).
februar 2001:	wildnistuur. ich fange nüt nois a i sache hünd und gäid ...
novämber 2001:	schlittehundeschuäl. as begrüässig häissz: "mir händ da 42 hünd und grad kän gäid däzue, wottsch dich vo a bis zätt um diä kümmere?". klar wotti. dä nachtäil isch, dasi niä mit Orion, Omega, Inook, Zorro, ... chan faare. d Priitta isch dä ganzi winter z Schpizzbärge.
novämber 2002:	schlittehundeschuäl. äntli wiider mitte Priitta irne hünd. si isch wiider vill nöd ume, ich treniäre iri hünd zäme mitte Nadine und äm Falk, wo für äi säson im kämp schaffed.
mäi 2003:	drü wuche mittem auto dur Skandinavie. psuäch im hundekämp. d Nadine und dä Falk sind immerno da. d Priitta isch wiider z Schpizzbärge.
novämber 2003:	schlittehundeschuäl (häisst jezz noi schlittehundeakademi). d Nadine hät jezz d Orion, d Omega, dä Inook, dä Zorro, ... überno. aso: hünd altbekannt, gäid "fasch noi".
januar 2004:	wildnistuur. aso wäni scho d möglichkäit han zum dä gäid und d hünd uszwääle ...
novämber 2004:	schlittehundeträning. so zimmli ales isch noi: ich faare mittem auto ufe, d Nadine und dä Falk sind nüme da, d Priitta isch ufem wäg uf Spizzbärge (hasi churz zum znachtässe troffe), d Omega und dä Inook sind scho z Spizzbärge, d Orion isch gschtorbe und di andere hünd sind chli andersch vertäilt (ich faare jezz mitte Svea und irne hünd, 16 sind jüngeri und elteri bekannti, 20 täfi noi käneleere).
märz 2005:	Arctic Trail Spitzbergen: absolut supper! äs paar schtichwort däzue: traumhafti landschaft, woone bi dä Priitta und em Anton, 2 übernachtige im zält ufäme gletscher, iisbärenässe imäne gletscher, ä chlini gruppe (mitte Gabi und em Olli) und natürlich sind d Omega und dä Inook i mim tiim ...
novämber 2005:	schlittehundeträning. än verpasste autozug. am afang gar kä schnee. Jillian us Kanada as noie gäid, d hünd me odr weniger di gliche (d Omega und dä Inook sind zwar zrugg vo Spitzberge, aber bimäne andere gäid). än churze usflug uf Spitzberge zu dä Priitta und em Anton (ja, ich bin chli waansinnig). i dä letschte wuche di erschte wildnistuuregescht und äntli schnee. und ä häifaart mit begläitig.
april 2006:	Arctic Trail Spitzbergen: das mal ä längeri tuur.
	voreme jaar händ d Gabi, dä Olli und ich beschlosse, dasmer mitte hünd dä nördlichschti punkt vo dä insle Spitzbergen, Verlegenhuken, wänd erobere. d Priitta unte Anton sind iverschtande xi und händ dänn au gli mal agfange mit organisiäre (bewilligunge, möglichi ruute, ...). was halt nöd planbar xi isch, isch s wätter: zersch sind mir und au d Priitta und iri brüädere, wo ois mitte schneetöff z Austfjordneset äs füätterdepo sind gogen irichte, wegem schturm gar nöd vo Bolterdalen wägg cho und händ scho di mäischte resärvetäg im huus verbrucht. wommer dänn äntli underwäx xi sind, hämmer gli mal müse feschtschtele, dass sich dä früälig das jaar viär wuche früänner mit wärmere tempärature bemärkbar macht und ois di gfrornige fjord afaat ufztaue. aso hämmer z Austfjordneset beschlosse, vo oisem ziil apzcho und däfür s weniger wiite Gråhuken uf dä weschtsiite vom Wijdefjord z erräiche. diä entschäidig isch sicher richtig xi, mir sind so mit zwäi lange etappe am schluss, aber oni schtress rächziitig wiider zrugg xi. äs sind traumhaft schöni ferie xi, mit schpannende begegnige (lüüt und iisbäre), ännäre fantastische landschaft, wächselnde wätterbedingige, noie kulinarische erfaarige, aschträngende ufschtiig und rasante apfaarte, und ämäne erfrischende bad im polarmeer ... än riisige dank ad Priitta fürs perfäkte organisiäre, äm Anton, daser ois sicher gfüärt hät, äm Juho & äm Pauli, ad Tina & äm Marcos, ad Ingebjørg & äm Lars Tore, dä Milla & dä Emma, äm Pete & sine fründe, äm Antti & siim tiim für d hilf, d gaschtfründschaft unti intressante gschpräch, unzowiiter. und natürli a oisi 32 superschportler für dass ois und d schlitte 600 km wiit zoge händ und überhaupt so wunderbari viärpfotigi begläiter sind.
**********

und jezz woisch ich oi: vill schpass bim föteli aluäge!

**********